حوار : دعاء العطار ، أسماء بسيوني
طارق عميره .. حينما تقرأ كتاباته تجد فيه شخصية الرومانسى الحالم الهادىء والمعارض الثائرالمتمرد تجده يكتب كل مايمسك كعاشق وكل ما يخصك كمواطن مصرى تؤلمه همومه يكتب فيطلق لقلمه العنان فتجده يكتب قصه قصيره مره وشعرمره اخرى واحيانا خواطر وايضاً مقالات فهو فنان متكامل وحينما يصادفك الحظ وتقابله تجد فيه تواضعاً شديداً فيعاملك وكأنك تعرفه من قديم الأزل
طارق عميره _ لمن لا يعرف _قد نشرله كتاب ناثر البخور ويتضمن الكتاب مجموعه من القصص القصيره منها ماهو سياسى ومنها ماهو رومانسى ومنها ما هو اجتماعى وقد لقى الكتاب قبولاً كبيراً وشارك فى كتاب " كوارث" ببعض الكتابات ولديه مدونه تدعى ايضاً " كوارث " كما انه قام بإنشاء جروب على الفيس بوك واطلق عليه اسم " اضحك كل يوم "
هذه نبذه مختصره عن طارق عميره فإذا اردتم ان تتعرفوا ع طارق عميره عن قرررب اكثر فربما يفيدكم هذا الحوار :
بدأت تكتب من امتى ؟ ومين شجعك ؟
بدأت بشبه انتظام وأنا عندي 17 سنه قبل كده مش فاكر بكتب من امتى تحديدًا بس من زمان قوي , كنت فاكر إني بدات متأخر بعدين اكتشفت مجلات ورقية كنت عاملها لمركز الشباب وبرلمان الطلائع وأشياء مشابهَة للمدرسة من غابر الأزمان , وبالنسبة لموضوع التشجيع في مصر فيا قلبي لا تحزن , شجعني جيل الشباب اللي أنا منّه ومن الكبَار الأب الروحي لشباب الكتّاب العرب د. أحمد خالد توفيق . مين اول حد قرا كتاباتك وكان ايه تعليقه عليها ؟
أستاذ الإنشاء في أولى إعدادي كان الموضوع عن قصة قصيرة من خيال الطالب وكان موضوع تاريخي لأنه الموضوع الوحيد في تاريخ المدرسة تقريبًا اللي خد 20 من 20 وتعليق الأستاذ كان إن القصة تستحق الحرق بس هي بشكلٍ ما محبوكة !
ايه اول حاجه اتنشرتلك وايه كان رد فعل الناس تجاهها ؟
قصّة الرجل الذي ابتعد على موقع بص وطل وكانت مفاجاة لكل اللي قرأها و عجبت الجميع الحمد لله وكانت التعليقات عليها مش بطالة وما زلت إلى الآن بتفاجأ بناس فاكراني من القصة دي .
مين أكتر كاتب أثر فيك وفى كتاباتك واسلوبك ؟
د . أحمد خالد توفيق , وهوا غني عن التعريف ولله الحمْد , و ما كنتش أتخيل في يوم إنه يقرا كتابي ويعجبه أو إني أقابله أصلاً , فيه ناس كتير بتقول ان أسلوبي فيه منه وإن كنت أنَا شخصيًا شايف إني بكتب بدون أي أسلوب .
ايه هدفك من كتاباتك ؟
الهدف بيختلف من كتَابَة لأخرَى , صعب حصره كله في مسمى واحد , بس الهدف عمومًا بغض النظر عن أي أهداف مرافقة بيكون الإنسَان
انت كتبت كذا نوع قصه قصيره مقالات خواطر شعر ايه اكتر نوع فيهم بتفضله ؟
مع إني بكتب قصص دايماً وبكره لقب الشاعر جدًا لكن بحب الشعر بس بكتب قصص أكتر والكتابة عمومًا ما زالت هوَايَة
هل كنت متوقع ان يتنشرلك كتاب وانت فى سن صغير كده ولا ده كان حلم بعيد ؟
هوّا كان حلم بس نشر الكتاب مش كل الأحلام , فيه بعد كده النجاح أو الفشل لكن التجربة مثيرَة , ده غير إن مضمون الكتاب هوا المعبر عن الحلم الحقيقي مش الهيئة , الرسالة اللي بتوصل والحبر المطبوع عبر الصفحَات ..
كتاب ناثر البخور وكتاب كوارث بيمثلوا ايه لطارق ؟
كتاب كوارث شرفت بالمشاركة فيه بمعظم المشاركات بس كان معايا آخرين وقصة مترجمَة , أمّا عن كتاب ناثر البخور فبيمثل كتابِي الأول شخصيًا وصار رغمًا عني إنطلاقتي الأولى الحقيقية في عالم الأدب .
ايه اكتر قصه فى كتاب ناثر البخور بتعبر عن شخصية طارق عميره ؟
بلدة جديدة ومحدش يفهمني غلط !
احلام طارق كان يتمنى يحققها وفعلا حققها واحلام لسه عايز يحققها ؟
في الادب الكتاب وده اتحقق , والقادم أجمل إن شاء الله
ايه الصعوبات اللى قابلتك فى تحقيق احلامك ؟
الكلام عالكتاب برضه يبقى كتير ابتداءًا من النقد الهجومي الهادِم , ومرورًا بآلاف مدعي الموهبة الأدبية و إنتهاءًا بدور النشر صاحبة الشروط العقيمة أو الماديات المرهقة
ليه دايماً بتوصف نفسك بانك وغد وايه هى الوغدنه من وجهة نظرك ؟
عشان أنا راجل مصري ساكت عن كل حقوقه , و الوغدنة لما نقول لا تستر على فساد و احنا عايمين فيه للركب
ليه اختارت اسم " كوارث" لمدونتك ؟
عشان مجتمعنا كله كوارث
ايه تعليقك على اللى بيقولوا علينا " شباب اخر زمن " ؟
العالم ماشي بالانترنت ومن يقودونه في بلادنا هم الشباب , الشباب الثروة القومية لاي بلد بتفهم , الشباب هوا اللي بدا يهز في عرش الحكومة اللي مستعبدة الناس وينزل شارع ويطالب بحقه وعدم اهانته , الشباب دلوقتي - كعادتهم - منهم اللي ممكن يقوم بحرب بكفاءه لوحده واللي يدير شركة بجهاز كومبيوتر .. دول فعلا شباب آخر زمن
اخر حاجه ايه النصيحه اللى ممكن تقدمها للشباب ؟
الإصرار هوا مفتاح النجاح , مش كلام كبار ولا حاجه بس لو الشباب لاحظ ان كل حد من الكبار والعظماء كان بيسعى دايمًا وما بيضيعش وقته مش هيضيع لحظة !
كان هذا حديثنا مع طارق عميره وكما رأينا طارق مثال لاى شاب يريد ان يفعل الكثير والكثير شاب تفتخر مصربأنه من شبابها شاب مثل اى شاب يمر يظروف صعبه ولكنه يرى أن الاصرار هو الاساس لاى نجاح ونستطيع أن نجزم حينما نجد امثاله أن " الشباب لسه بخيييييييييير
No comments:
Post a Comment